პროექტი „ძალა ერთობაშია“

რამდენადაც სულ ერთი თვეა, რაც პირველი კლასი ჩავიბარე, საგაკვეთილო პროცესი 35 წუთიანია და არასაგაკვეთილო დრო საკმაოდ მქონდა, გადავწყვიტე მიზნობრივად გამომეყენებინა იგი და გამეგო თუ რა შემოქმედებითი უნარ-ჩვევები ჰქონოდათ ჩემს მოსწავლეებს. ამ მიმართულებით შევეცადე ჩემი წინა ორი კლასის იმ მოსწავლეების ცოდნა და გამოცდილება გამომეყენებინა, რომლებიც ამა თუ იმ მიმართულებით არაერთ კონკურსში იყვნენ გამარჯვებულნი, სოციალური ადაპტაციის მიზნით ჩამერთო ისინი პროექტში „ძალა ერთობაშია“. იდეამ მოწონება დაიმსახურა როგორც მოსწავლეებში, ასევე მათ მშობლებშიც.

პროექტის სახელწოდება: „ძალა ერთობაშია“

პროექტის ხელმძღვანელი: იზოლდა ხუნწელია

პროექტის მიზანი: მოსწავლეთა თანამშრომლობითი უნარ-ჩვევების ფორმირება, არასაგაკვეთილო დროის მიზნობრივად გამოყენება, ჯგუფური მუშაობის გამოცდილების შეძენა, შემოქმედებითი უნარების გამოვლენა;

კლასი: პირველი, მეცხრე და მეთერთმეტე

პროექტის ხანგრძლივობა: 20 სექტემბერი - 21 ოქტომბერი

მოსალოდნელი შედეგები: მოსწავლეები შეიძენენ ჯგუფური მუშაობის გამოცდილებას, საფუძველი ჩაეყრება გუნდური მუშაობის პრინციპების ფორმირებას, შეიძენენ უშულოდ მათი წინამორბედებისაგან უნარ-ჩვევებს მათთვის საინტერესო მიმართულებით.

საჭირო რესურსები: სახატავი ფანქრები, საქსოვი ჩხირები, ძაფები, ფანდური, ფლიტჩარტი

პროექტის მსვლელობა:

აქტივობა I: პროექტის მიზნებისა და ამოცანების გაცნობა, მოსწავლეთა შემოქმედებითი უნარების გამოვლენა

აქტივობა II: მოსწავლეთა დაყოფა ჯგუფებად მათი ინტერესების და შესაძლებლობების მიხედვით;

აქტივობა III: ხატვის, ქსოვის, ფანდურზე დაკვრის შემსწავლელი ჯგუფების მუშაობის ორგანიზება;

აქტივობა IV: ექსკურსია მახლობელ პარკში და ბუნებაზე დაკვირვებით ხატვა და ქსოვა;

აქტივობა V: პენსიონერი მასწავლებლის ნანა გაბუნიას მონახულება, საკუთარი ხელით შესრულებული სიმბოლური საჩუქრების გადაცემა, სიმღერები ფანდურის თანხლებით;

აქტივობა VI: გამოფენის მოწყობა „ძალა ერთობაშია“; პრეზენტაცია მშობლებისა და სკოლის დირექციის მონაწილეობით, თუ რა გამოვიდა კარგად და რას გააკეთებენ მომავალში;

რეფლექსია

პროექტის მიზანი იყო, მოსწავლეები გაცნობოდნენ გუნდური მუშაობის პრინციპებს, შვეცადე გამომევლინა მოსწავლეთა ინტერესები და შესაძლებლობები, მაქსიმალურად ეფექტურად გამომეყენებინა არასაგაკვეთილო დრო და გამიჩნდა იდეა მიზნის სისრულეში მოსაყვანად, გამომეყენებინა არაერთ კონკურსში გამარჯვებული, ჩემს მიერ წინა კლასებში გამოშვებული მოსწავლეები, რომლებიც ამჟამად მეხუთე და მეცხრე კლასებში სწავლობენ. შედეგმა მოლოდინს გადააჭარბა. მოსწავლეთა ინტერესი იმდენად დიდი იყო ქსოვის, ფანდურზე დაკვრის, ხატვის მიმართ, რომ მოითხოვეს აღნიშნული პროექტის მთელი წლის მანძილზე გაგრძელება. იდეა სხვა კლასების მასწავლებლებმაც აიტაცეს. პროექტის კულმინაცია იყო გამოფენა, რომელსაც უამრავი მნახველი ჰყავდა. ვეცდები მომავალში უფრო ფართო მასშტაბები მივცე და მათ მონაწილეობა მივაღებინო რაიონულ ღონისძიებებში, რათა უფრო ფართო საზოგადოებისთვის გახდეც ცნობილი მათი ნამუშევრების შესახებ, რაც შეიძლება მეტად გამოვავლინო სხვა მიმართულებითაც მათი შესაძლებლობები.

ნორჩ ნატურალისტთა კლუბი

კლუბის დაარსების იდეა მოსწავლეებისგან წამოვიდა. მას წინ უსწრებდა ჩემს მიერ მიცემული დავალება, რომ მოსწავლეებს გამოეკვლიათ სკოლის გარემო და მისი შემოგარენის ეკოლოგიური მდგომარეობა. შეიკრიბნენ საერთო აზრის მქონე მოსწავლეები, შევთანხმდით სკოლის დირექტორთან კლუბის დაარსების იდეაზე და როდესაც მოვიპოვეთ მისი მხარდაჭერა ჩამოვაყალიბეთ კლუბის მიზნები.

კლუბის სახელწოდება - „ნორჩი ნატურალისტები“.

კლუბის პრეზიდენტი - თორნიკე გეგეჭკორი.

კლუბის წევრი - 21 წევრი

კლუბის მუშაობის პერიოდი - 2019 წლის თებერვალი - 2020 წლის თებერვალი

განვსაზღვრეთ რა მასალა გვჭირდებოდა იმისთვის, რომ დაგვეწყო და დაგვესრულებინა პროექტი.

რესურსების შეძენაში დაგვეხმარა სკოლის დირექცია და რაიონის დასუფთავების სამსახური.

კლუბის მიზანი:

ü  გარემომცველი გარემოს შესახებ ცნობიერების ამაღლება.

ü  გარემოში არსებული პრობლემების გაცნობიერება და მათი გადაჭრის გზების ძიება.

I აქტივობა

სკოლისა და მისი მიმდებარე ტერიტორიის რეგულარული დასუფთავება;

II აქტივობა

დედამიწის დღის აღნიშვნა;

III აქტივობა

კონკურსი - ბუნებრივი გარემოს შესახებ არსებული ცოდნის გამოვლენა (ტყე, ველური ბუნება, წყალი);

IV აქტივობა

გასვლითი ექსკურსიების მოწყობა (წაჩხურუს მონასტრის მიმდებარე ტერიტორია, სალხინო, მარტვილის კანიონი, მარტვილის ცენტრალური პარკი, მარტვილის მონასტრის მიმდებარე ტერიტორია);

V აქტივობა

ეკოლოგიური ცნობიერების ამაღლებისთვის საინფორმაციო ბროშურების გამოყენება;

VI აქტივობა

ფოტო-გამოფენის მოწყობა;

რეფლექსია

კლუბის დაარსების მიზანი იყო ამემაღლებინა მოსწავლეებისთვის გარემოს დაცვის შესახებ მოსწავლეთა ცნობიერება, გარემო პირობების გაუმჯობესება და საზოგადოებრივი აზრის ჩამოყალიბება, რომ ცხოვრების ხარისხი დამოკიდებულია ტექნოლოგიურ განვითარებასა და დედამიწის რესურსების გონივრულ მართვას შორის ბალანსის მიღწევაზე. განსაკუთრებით ეფექტური აღმოჩნდა რომ მათი მოქმედება გადამდები აღმოჩნდა გარშემომყოფთათვის და ისინიც ჩაერთნენ აღნიშნულ აქტივობებში.

გარდა ამისა, კლასისთვის, რომელსაც ახლა ვხელმძღვანელობ საუკეთესო მაგალითი გამოდგა, ისინიც ცდილობენ მიბაძონ მათ, აქტიურად არიან ჩაბმულნი სკოლის ფარგლებში მათი ასაკის შესაბამისად გარემოს დაცვით ღონისძიებებში.

კლუბში მუშაობამ საკმაო გამოცდილება მომცა, რასაც გამოვიყენებ მომდევნო საქმიანობაში, გავაფართოებ მასშტაბებს კლუბის მუშაობაში უფროს კლასელთა ჩართვით, მითუმეტეს ისინი გამოთქვამენ სურვილს თანამშრომლობისთვის.

ჩემს შესახებ

მე, იზოლდა ხუნწელია დავიბადე 1950 წლის 10 მაისს მარტვილის რაიონში. საშუალო სკოლა დავამთვარე 1967 წელს, 1975 წელს დავამთავრე ქუთაისის ალ. წულუკიძის სახელობის პედაგოგიური ინსტიტუტი, პედაგოგ-მეთოდისტის სპეციალობით; 

მუშაობა დავიწყე 1981 წელს მარტვილის N2 საჯარო სკოლაში, სადაც ვმუშაობ დღემდე. 

გავიზარდე პედაგოგის ოჯახში და ამ პროფესიისადმი სიყვარული ჩემი ცხოვრების ნაწილია. ჩემი ასაკი საკუთარი ნამოღვაწარით ტკბობის ასაკია და ამ მხრივ მართლაც ბევრი მაქვს მოსაგონარი. ჩემი ყოველი დღე სკოლაში ბავშვების შემოგეგებით იწყება, რაც უდიდეს სიამოვნებას მგვრის და ამავდროულად უდიდესი მოტივაციაცაა ჩემთვის. ჩემი მოსწავლეებისთვის მინდა სრულად დავიხარჯო.

სოციალური პროექტი:,,ჯანსაღი მომავალი ’’

პროექტის  მიზნები  - ცნობიერების ამაღლება  მავნე ჩვევების უარყოფითი შედეგების  და ჰიგინის ზოგადი წესების შესახებ, მოხდეს მავნე დამოკიდებულების  გაანალიზება  და მათი პრევენცია  ჯანსაღი ცხოვრების წესის  დამკვიდრებით.

პროექტში მონაწილენი:  მოსწავლეები, მასწავლებლები და მშობლები, თემი;

პროექტის ხელმძღვანელი: იზოლდა ხუნწელია

დასაწყისი:    25 ოქტომბერი 2019 წელი

დასასრული:  22 ნოემბერი 2019 წელი

მოსალოდნელი შედეგები:  პროექტის განხორციელებისას  მოსწავლეები მიიღებენ   ინფორმაციას მავნე ჩვევების მავნებლობის  შესახებ.   პროექტის ფარგლებში განხორციელებული ღონისძიებები ხელს შეუწყობს ჯანსაღი ცხოვრების წესის დამკვიდრებას ახალგაზრდებში. განუვითრდებათ:

·         სოციალური და სამოქალაქო კომპეტენცია:

·         კონსტრუქციული თანამშრომლობა;

·         პრობლემის მოგვარება;

პროექტის აქტუალობა:

პროექტი აქტუალურია ,რადგანაც მოსწავლეებში ჰიგიების და ცხოვრების ჯანსაღი წესის  დამკვიდრება არის არა მარტო ფიზიკური, არამედ სულიერი გაჯანსაღებისაკენ გადადგმული ნაბიჯი.

პროექტის თემატიკა

სამუშაო ჯგუფების შექმნა და  გააანალიზება  იმისა თუ ,,რას ნიშნავს ჯანსაღი გარემო’’

შეხვედრა სკოლის ექიმთან (მავნე ჩვევების და ზოგადი ჰიგიების წესის შესახებ)

საუბრები  „რას ნიშნავს ჩემთვის ჯანსაღი ცხოვრების წესი“- სადაც უფროსი კლასის მოსწავლეები  გაუზიარებენ საკუთარ გამოცდიელებას

მარტვილის საფეხბურთო სკოლის ფეხბურთელებთან ვიზიტი, ინტეგრირებული პროექტი სპორტის მასწავლებელთან

სპორტული შეჯიბრი - „სპორტული აქტივობები - ჯანსაღი ცხოვრების საწინდარია“

პროექტის რესურსები:

კომპიუტერი, აუდიო მოწყობილება, ინტერნეტი, ადამიანური რესურსები , სპორტული ინვენტარი.

რეფლექსია

მოსწავლეთა სოციალური უნარების გასაუმჯობესებლად, მათში ჯანსაღი ცხოვრების წესის შესახებ ცნობიერების გასავითარებლად გადავწყვიტე შემეთავაზებინა პროექტი „ჯანსაღი მომავალი“; პროექტს წინ უსწრებდა სხვადასხვა სიტუაციების გარჩევა და მათი აზრის მოსმენა ამა თუ იმ არასასურველი ქცევის განხილვისას. განსაკუთრებული აქცენტი მინდოდა გამეკეთებინა ჰიგიენის ზოგადი წესების ცოდნის მნიშვნელობაზე, რამეთუ მასზე დიდაა დამოკიდებული ჩვენი ჯანმრთელობა.

პროექტის განმავლობაში მოსწავლეებისთვის საინტერესო აღმოჩნდა სკოლის ექიმთან შეხვედრა და იმ ზოგადი ინფორმაციის გაცნობა, რაც აუცილებელია ჯანსაღი ცხოვრების წესის დასამკვიდრებლად. გაიაზრეს ზოგადი ჰიგიენის მნიშვნელობა.

განსაკუთრებულად საინტერესო აღმოჩნდა მარტვილის საფეხბურთო სკოლის წარმომადგენლებთან შეხვედრა და მათგან მიღებული ინფორმაციის შემდეგ, ბევრმა მოსწავლემ გადაწყვიტა ფეხბურთზე სიარული, ვინაიდან გააცნობიერეს რომ სპორტი ჯანსაღი ცხოვრების საწინდარია.

პროექტი თავისი შინაარსიდან გამომდინარე აუცილებელია მომდევნო სემესტრშიც გაგრძელდეს, ვინაიდან ჯანსაღი ცხოვრების წესი აუცილებელია იქცეს ცხოვრების თანმდევ ყოველდღიურ მოვლებად და არა დროებით აქტივობად.

პროექტის ხელმძღვანელი: იზოლდა ხუნწელია

სოციალური პროექტი - "კეთილი“ შემოდგომა"

პროექტის გეგმა

პროექტის სახელწოდება: "კეთილი“ შემოდგომა"

მასწავლებელი: იზოლდა ხუნწელია

ჩატარების ადგილი: სსიპ მარტვილის N2 საჯარო სკოლა

პროექტში მონაწილენი:  მოსწავლეები, მასწავლებლები და მშობლები, თემი;
პროექტზე მუშაობის ვადები: 7 - 28 ოქტომბერი.

პროექტის მიზანი: ცნობიერების ამაღლება მოსწავლეებში ეკოლოგიაზე, შემოდგომის თანმხლები ერთ-ერთი ბუნებრივი პროცესის (ფოთოლცვენის) სარგებლიანობაზე, მის აქტიურ გამოყენებაზე ყოფით ცხოვრებაში. თანამშრომლობისა და მარტივი შრომითი საქმიანობის უნარ-ჩვევების ფორმირება; მოსწავლეებში სოციალური  და შემოქმედებითი უნარების განვითარება.

მოსალოდნელი შედეგები.

·         სოციალური და სამოქალაქო კომპეტენცია:

·         კონსტრუქციული თანამშრომლობა;

·         პრობლემის მოგვარება;

·         კრიტიკული და შემოქმედებითი აზროვნება;

პროექტის აქტუალობა: შემოდგომა წელიწადის ერთ-ერთი გამორჩეული დროა, იგი განსაკუთრებულად ლამაზი და ბარაქიანია. შემოდგომა სიკეთის მომტანია არა მხოლოდ უხვი მოსავლის გამო, არამედ ჩამოცვენილი ფოთლები და მისგან დამზედებული ბუნებრივი სასუქი (კომპოსტი) ერთ-ერთი საუკეთესოა სოფლის მეურნეობაში გამოსაყენებლად. საზოგადოებაში არასწორადაა დამკვიდრებული ჩვევა, როდესაც შემოდგომით ფოთლებს აგროვებენ და წვავენ, ამით პირდაპირი ზიანი ადგება გარემოს, წვის შედეგად გამოფრქვეული ემისიების და სხვა მავნე ორგანიზმების გამო.  თემა აქტუალურია იმდენად, რამდენადაც ემთხვევა წელიწადის ამ პერიოდს. პროექტში მონაწილეობა ბავშვებს, მშობლებს და პროექტის სხვა აქტორებს აუმაღლებს ცოდნას და შესძენ განსხვავებულ დამოკიდებულებებს ბუნებასთან, არასწორი ჩვევით გამოწვეულ ეკოლოგიურ პრობლემებთან. პროექტის ფარგლებში მოსწავლეები ადვილად შეძლებენ მოიძიონ თემასთან დაკავშირებული მასალები და გაგვიზიარონ საკუთარი ემოციები.

პროექტის მსვლელობა და აქტივობები

შემოდგომის თემატური ციკლის შესწავლის შემდეგ გვექნება თემის სრული განხილვა-შეჯამება, რომელზეც კიდევ ერთხელ მოხდება მხატვრული ნაწარმოებების ზეპირი აღქმა.

7 ოქტომბერი - მოსწავლეები აღწერენ შემოდგომის შემოსვლას თავიანთ სოფლებში. პირველკლასელებს საშუალება ექნებათ გაიზიარონ უფროსკლასელების (V კლასი) შეხედულებების აღნიშნულ საკითხზე. პროექტის ფარგლებში მოხდება მსჯელობა ეკოლოგიურ პრობლემებზე, რომელიც ფოთლების წვასთან არის დაკავშირებული და იმ სარგებელზე რაც ფოთლის ნეშომპალად ქცევამ შეიძლება გამოიწვიოს.  შეაგროვებენ ფოთლებს და ყვავილებს, რომელსაც შეინახავენ სასწავლო წიგნებში.

ჯგუფს მიეცემა დავალება, მაქსიმალურად გაუზიარონ უფროსებს მიღებული ინფორმაცია, რათა შემცირდეს გარემოში ამ გზით გამოწვეული პრობლემები.

14 ოქტომბერი - შექმნიან ნახატებს შთაბეჭდილებების მიხედვით. იმსჯელებენ ერთმანეთის ნამუშევრებზე. უფროს კლასელების დახმარებით იმუშავებენ გასავრცელებელ საცნობარო ბარათებზე.

21 ოქტომბერი - მოსწავლეები შეგროვილი ფოთლებისა და ყვავილებისგან დაამზადებენ ჰერბარიუმებს. მოეწყობა ვიდეო ჩვენება „როგორ დავამზადოთ ბუნებრივი სასუქი ფოთლებისგან“.

28 ოქტომბერი - შეგროვილი მასალებისგან (ხილი, ფოთლები და სხვა) მოეწყობა საშემოდგომო კუთხე, საკუთარი ნაშრომების გამოფენა (ჰერბარიუმი, ნახატები და სხვა), მოწვეული სტუმრებისთვის გაიმართება პრეზენტაცია და მოსწავლეები გაუზიარებენ საკუთარ შთაბეჭდილებებს და მიღებულ ცოდნას პროექტის ფარგლებში.

პროექტისთვის საჭირო ძირითადი რესურსები: ფლომასტერები, სახატავი ფურცლები, ფორმატის ქაღალდი, ფერადი ქაღალდები, კომპიუტერი, ფოთლები, სოფლის ნობათი.

განხორციელებული აქტივობები: 
პროექტის ფარგლებში ერთ-ერთ აქტივობად გათვალისწინებული იყო საშემოდგომო კუთხის მოწყობა, რაშიც ხალისით ჩაერთვნენ მოსწავლეები;

რეფლექსია

პროექტის „კეთილი შემოდგომა“ დაწყებამდე გადავწყვიტე პროექტის ღირებულებაში დამერწმუნებინა მოსწავლეები და გამეღვიძებინა მათი მოტივაცია. თემა აქტუალური იყო, იმდენად, რამდენადაც ემთხვეოდა წელიწადის ამ პერიოდს - შემოდგომას. სათაურიც თვითონ შეარჩიეს მოსწავლეებმა და მას „კეთილი“ უწოდეს, რადგანაც ის უხვად გვაჯილდოებს მოსავლით და გვამარაგებს მთელი ზამთრის სარჩო-საბადებლით. წელიწადის ამ დროის სიმშვენიერე ყველაზე კარგად შეიგრძნეს ბავშვებმა, როდესაც საკუთარი ხელით შეგროვილი ხილით მოაწყვეს საშემოდგომო კუთხე და უმასპინძლდებოდნენ მნახველებს.

პროექტი თავისი მიზნიდან გამომდინარე მხოლოდ წელიწადის დროის ჩარჩოებს გასცდა და შეიძინა სოციალური აქტუალობა. პროექტის განხორციელებისას მოსწავლეებმა გაიგეს, რომ წელიწადის ამ დროისთვის უხვად ჩამოცვენილ ფოთლებს დიდი სარგებლის მოტანა შეუძლია, მისი წვისგან გამოყოფილი ემისიები კი უდიდეს ზიანს აყენებს გარემოს. ეს მოსწავლეთა მშობლებისთვისაც საინტერესო ინფორმაცია იყო. მშობლებმა და მოსწავლეებმა გადაწყვიტეს შეგროვილი ფოთლებისაგან და საყოფაცხოვრებო ანარჩენებისაგან დაემზადებინათ კომპოსტი, რომლის შედეგსაც ნახავენ გაზაფხულზე საკუთარი ბოსტნის განოყიერების შედეგად.

ვფიქრობ, უმჯობესი იქნებოდა, რამდენადაც სკოლის ეზოში ფოთლების დიდი რაოდენობა გროვდება, კომპოსტი სკოლაშიც დაგვემზადებინა და ეკოლოგიურ საკითხებზე სკოლაში მომუშავე სხვა კლასის მოსწავლეებთან ერთად გამოგვეყენებინა სკოლაში არსებული ნარგავების გასანოყიერებლად.

პროექტის ხელმძღვანელი: იზოლდა ხუნწელია

სოციალური პროექტი : ,,სოციალური ადაპტაცია“

პროექტის გეგმა

პროექტის სახელწოდება: ,,სოციალური ადაპტაცია“

მიზანი: ზრუნვა ემპათიის განვითარებაზე. სხვისი ემოციების გაგების, წვდომისა და თანაგანცდის უნარის განვითარება მეგობრებთან თუ თანაკლასელებთან კარგი ურთიერთობების დამყარებისა და შენარჩუნებისთვის.

პროექტში მონაწილენი:  მოსწავლეები, მასწავლებლები და მშობლები;

პროექტის ხელმძღვანელი: იზოლდა ხუნწელია

დასაწყისი:    8 ოქტომბერი 2019 წელი

დასასრული:  29 ოქტომბერი 2019 წელი

პროექტის აქტუალობა: ემპათიის მნიშვნელობის განმარტება პატარა ბავშვებისთვის ერთი შეხედვით შეიძლება საკმაოდ აბსტრაქტულ და რთულ ამოცანად მოგვეჩვენოს. მაგრამ, იმისთვის, რომ ბავშვმა სხვისი ემოციის აღქმა და შესაბამისად რეაგირება შეძლოს, მნიშვნელოვანია, ესმოდეს გრძნობათა ფართო სპექტრი, რომელსაც იგი ყოველდღიურად განიცდის და ისიც, რომ სხვა ადამიანებს შეიძლება მსგავს სიტუაციაში განსხვავებული ემოციები დაეუფლოთ. ვინაიდან მიიჩნევა, რომ რაც უკეთ შეგვიძლია საკუთარი და სხვისი ემოციების ამოცნობა, მით მეტად შეგვიძლია თავის მართვა და სხვათა დახმარებაც. ეს კი აუცილებელი უნარებია მეგობრებთან თუ თანაკლასელებთან კარგი ურთიერთობების დამყარებისა და შენარჩუნებისთვის.

პროექტის ამოცანები და განხორციელების გზები:

პროექტის დასახული მიზნის მიღწევა პირველ რიგში საკუთარი ემოციების ამოცნობის უნარის განვითარების ხელშეწყობით არის შესაძლებელი. მართალია, თანაგრძნობის უნარი ასაკთან ერთად გვიმუშავდება, მაგრამ არსებობს სხვადასხვა სტრატეგია, რომელთა დახმარებითაც შეგვიძლია ბავშვებს ეს გრძნობა განვუვითაროთ.

აქტივობა I

განვახორციელეთ აქტივობა ,,ამოიცანი ემოცია’’ აქტივობის განხორციელებისთვის საჭიროა ბარათები სიტუაციებით,

▪ ბავშვი დავარდა და მუხლი დაიზიანა;

▪ სკოლაშია და მოშივდა;

▪ ყური სტკივა და სიცხე აქვს;

▪ მასწავლებელმა მისცა შენიშვნა;

▪ ქურთუკს იცვამს და ელვა გაეჭედა მისი შეკვრის დროს;

მოსწავლეები სხდებიან წრეზე. მასწავლებელი უკითხავს სიტუაციას ან სთავაზობს ბარათს შესაბამისი ილუსტრაციით. მოსწავლეებს დარიგებული აქვთ ბარათები სხვადასხვა ემოციათა სახელწოდებებით. მაგ, მოწყენილი, მხიარული, შეშინებული, შეშფოთებული, გაკვირვებული, გაბრაზებული, ამაყი, ბედნიერი. მოსწავლეები პასუხობენ შეკითხვებზე: რას გრძნობს ბავშვი?/რას იგრძნობდით თქვენ ამ დროს? ბავშვებს შეუძლიათ ამოირჩიონ ნებისმიერი ბარათი, აჩვენონ ჯგუფს და დაასახელონ. ასეთ დროს ბავშვები აკვირდებიან, რომ ადამიანებს ერთსა და იმავე სიტუაციაში შეიძლება განსხვავებული ემოციები გაუჩნდეთ.

აქტივობა 2

მას შემდეგ, რაც მოსწავლეებს მივაწვდით ინფორმაციას ემოციების შესახებ, შეგვიძლია წამოვიწყოთ დისკუსია – ჩვენი გარშემომყოფების როგორმა ქცევამ/კეთილმა საქმემ შეიძლება დაგვაყენოს კარგ ხასიათზე და ზოგადად, კლასში, თუ ჩვენ ქალაქში შექმნას კარგი კლიმატი.

აქტივობა 3

იდეების გენერირების შემდგომ შესაძლოა, კლასში გავაკრათ კეთილი საქმეების ჩამონათვალი, საიდანაც მოსწავლეები თავად აირჩევენ მათთვის სასურველ კეთილ საქმეს.

შესაძლოა ეს იყოს:

▪ ღიმილიანი მისალმება ნაცნობებისადმი;

▪ კარის დაჭერა ვინმესთვის, ვინც ოთახში შემოდის;

▪ მოწყენილი მეგობრისთვის სასაცილო ამბის მოყოლა;

▪ დაფის გაწმენდა, კლასის მოწესრიგება მანამ, სანამ ვინმე ამის გაკეთებას დაგვავალებს;

▪ ყვავილების მორწყვა;

▪ სკოლის ეზოს გალამაზება ფერადი ცარცებით.

აქტივობა 4

იდეები,რომლებიც იმგვარ საქმიანობებს, რომელთა განხორციელებასაც შედარებით მეტი დრო და გარკვეული რესურსი სჭირდება. კერძოდ:

▪ მშიერი ცხოველების დაპურება;

§  სიკეთის ჟურნალის დამზადება.

მისი პუნქტებია :

▪ კვირის განმავლობაში რა კეთილი საქმის/საქმეების გაკეთება შემიძლია ჩემი თანაკლასელისათვის/სკოლელისათვის?

▪ მოიფიქრეთ და დახატეთ, რა კეთილი საქმის გაკეთება შეგიძლიათ კვირის განმავლობაში?

▪ რა კეთილი საქმე გაგიკეთათ სხვა ადამიანმა?

▪ რას გრძნობთ, როდესაც სიკეთეს გიკეთებენ?

▪ დახატეთ, რა სიკეთე გააკეთა სხვა ადამიანმა თქვენთვის.

▪ მე შემიძლია სიკეთე ჩემ მეგობარს დავანახო იმით, რომ…

▪ რა კეთილი საქმეების მაგალითებს ვხვდები ჩემს კლასში?

აქტივობა 4

შეჯამება

ყველა ადამიანი დღეში ერთ სიკეთეს რომ აკეთებდეს, როგორი იქნებოდა, თქვენი აზრით, ჩვენი ქალაქი/სოფელი/სამყარო?

▪ ჩემთვის სიკეთე არის..

▪ დახატეთ, რა არის სიკეთე

მოსალოდნელი შედეგები.

Ø  სოციალური და სამოქალაქო კომპეტენცია:

Ø  კონსტრუქციული თანამშრომლობა;

Ø  პრობლემის მოგვარება;

რესურსები:  ინტერნეტი, ფერადი ფურცლები, ფერადი ფანქრები, ბარათები

რეფლექსია

მოსწავლეთა სოციალური ადაპტაციის გასაუმჯობესებლად, მათში სხვისი ემოციების გაგების წვდომისა და თანაგანცდის უნარის გასავითარებლად გადავწყვიტე შემეთავაზებინა მოსწავლეებისთვის პროექტი „სოციალური ადაპტაცია“; პროექტს წინ უსწრებდა სხვადასხვა სიტუაციების გარჩევა და მათი აზრის მოსმენა ამა თუ იმ არასასურველი ქცევის განხილვისას. განსაკუთრებული აქცენტი მინდოდა გამეკეთებინა სიკეთის ქმნის და ურთიერთთანაგრძნობის მნიშვნელობაზე, რამეთუ ყოველდღიურ ცხოვრებაში აწყდებიან ჩაგვრისა და უხეშობის ფაქტებს.

პროექტის ეფექტურობა  შეიძლება შეფასდეს იმით, რომ მოსწავლეებს ჩვევად ექცათ ყოველდღიურ ცხოვრებაში მსგავსი ქმედებების კეთება, როგორიცაა, მაგალითად: ღიმილიანი მისალმება ნაცნობებისადმი, კარის დაჭერა ვინმესთვის, ვინც ოთახში შემოდის, მოწყენილი მეგობრისთვის სასაცილო ამბის მოყოლა, დაფის გაწმენდა, კლასის მოწესრიგება, სანამ  ამის გაკეთებას ვინმე დაგვავალებს, ყვავილების მორწყვა, სკოლის ეზოს გალამაზება და სხვა.

პროექტის განმავლობაში მოსწავლეებმა გაიაზრეს სიკეთის არსი, მისი გაკეთების აუცილებლობა და რომ სიკეთე გადამდებია. პროექტის ერთ-ერთ აქტივობას წარმოადგენდა ქუჩის ძაღლების დაპურება, რაშიც დიდი ენთუზიაზმით ჩაებნენ, რამდენიმემ გამოთქვა სურვილი ქუჩაში ნაპოვნი ლეკვების სახლში წაყვანისა.

რამდენადაც პროექტში გათვალისწინებული მქონდა „სიკეთის ჟურნალის“ დამზადება, რამაც პრაქტიკაში მოითხოვა მოსწავლეთა წერითი უნარ-ჩვევები, რაც დამაბრკოლებელი ფაქტორი აღმოჩნდა სიკეთის ჟურნალის პროექტში ჩადებული სახით შესაქმნელად, რასაც მომდევნო სემესტრში გავითვალისწინებ.

პროექტის ხელმძღვანელი: იზოლდა ხუნწელია